Монголын Урчуудын эвлэлийн шагналт, зураач А.Чадраабал “Тэнгэрийн өрх” бүтээлдээ дэлхийн таван тивийн олон үндэстэн эх дэлхийгээ хайрлан хамгаалах, хүн төрөлхтний шинжлэх ухааны нээлт ололт, оюун санааны эв хамтын ажиллагааны харилцаа холбоог илтгэж, нүүдэлчдийн өнө эртний түүх соёл урлагийн өвийг дүрслэн харуулахыг зорьжээ.
Тэрээр Төв аймагт төрж өссөн бөгөөд удам дамжсан зураач нэгэн. 2001 онд МУБИС-ийг Дүрслэх урлагийн багш мэргэжлээр төгссөн. 2004 онд “Цэнхэр бороо” анхны үзэсгэлэнгээ Дүрслэх урлагийн музейд гаргаж байсан бөгөөд түүнээс эх орондоо төдийгүй Олон улсын тавцанд хэд хэдэн удаа үзэсгэлэнгээ гаргасан байна.
Түүний “Тэнгэрийн өрх” бүтээл нь өнгөрсөн 12 дугаар сараас Их жанжин Д.Сүхбаатарын талбайн урд цэцэрлэгт хүрээлэнд байрлагдсан бөгөөд тус бүтээлээрээ төрийн дээд “Алтан гадас” одон хүртжээ. “Тэнгэрийн өрх” үзэсгэлэн Төв аймгийн музейд бүтэн сарын турш гарах юм.
