Монгол Улсын Ерөнхий сайд Ж.Эрдэнэбат Төв аймгийн Жаргалант сумын нутаг дахь “Хөх баян булаг” ХХК-ийн улаан буудайн тариалалтын явцтай танилцлаа. Ерөнхий сайдын ажлын хэсгийн бүрэлдэхүүнд УИХ-ын гишүүн Н.Энхболд, Төв аймгийн ЗДТГ-ын дарга Ч.Сарангэрэл тэргүүтэй хүмүүс оролцлоо. Тус компани энэ онд 3000 мянган га талбайд улаан буудай тарихаар төлөвлөөд байгаа бөгөөд өнгөрсөн 4 дүгээр сарын 8-наас тариалалт эхэлсэн, өнөөдрийн байдлаар тариалалт 93 хувьтай явагдаж байгаа аж. Энэ жил Засгийн газар үүлэнд зориудаар нөлөөлөх хөрөнгийг шийдвэрлэсэн. Иймд хур бороо, чийг хангалттай сайн авна гэдэгт итгэж байгаагаа тус компанийн захирал Ж.Ариунболд хэлээд албаны хүмүүст талархлаа илэрхийллээ.
Төв аймгийн Засаг даргын захирамжаар тариалалтын штаб байгуулагдан 5 дугаар сарын 5-наас аймгийн хэмжээнд тариалалт эхэлсэн. Манай аймаг энэ жил 93 мянган га талбайд үр тариа тариалахаар төлөвлөөд байгаа бөгөөд энэ сарын 20-ны байдлаар тариалалт 50 хувьтай явагдаж байна. Мөн 6500 га талбайд төмс, 900 гаруй га талбайд хүнсний ногоо, 7000 гаруй га талбайд тэжээлийн ургамал тариалахаар төлөвлаад байгаа юм.