Шүрэнгийн УЦС-ын төслийг хэрэгжүүлэх эсэх тухай шийдвэрийг гаргахаас өмнө нэн түрүүнд төслийн техник-эдийн засаг, байгаль орчин, нийгмийн нөлөөллийн нарийвчилсан судалгаа үнэлгээг хийх юм. Энэ ажлын хүрээнд өнөөдөр /2017.06.28/ Уул уурхай дэд бүтцийн хөрөнгө оруулалтыг дэмжих төслийн баг эдгээр судалгааны ажлын бэлтгэл болон гүйцэтгэх шатанд төслийн нөлөөлөлд өртөж болзошгүй бүс нутгийн иргэд, сонирхогч талуудын санал бодлыг сонсож, тусгах зорилгоор олон нийтийн нээлттэй хэлэлцүүлгийг Орхон аймгийн иргэдийн дунд хийлээ.

    20300 га талбай бүхий Булган аймгийн 2 сум, Сэлэнгэ аймгийн 3 сумын нутаг дэвсгэрийг хамрах УЦС-ын усан сан барих нь манай аймгийн усны ундны усны аюулгүй байдалд хэрхэн нөлөөлөх талаар иргэд нилээдгүй асууж байв. Эрдэнэт хот уруу ус дамжуулах 24 цооног нь хотоос 60 км зайд байдаг. Эдгээр цооногоос 2 км доор Шүрэнгийн УЦС-ын усан санг үүсгэх учир Эрдэнэтийн усан хангамжид ямар нэгэн нөлөө байхгүй гэдгийг албаны хүмүүс мэдэгдлээ.

    Олон улсын туршлагаар Канад, АНУ, Япон, Хятад зэрэг улсууд усны эрчим хүчийг хамгийн их ашигладаг ба Шүрэнгийн УЦС-ыг 50 гаруй жил ашиглагдана хэмээн үзэж байна. Тиймээс УЦС-ыг барьж байгуулах болон цаашид ажиллах боловсон хүчнээ тухайн орон нутгаас бэлтгэж ажиллуулна. Мөн усан сан орчимд 123 өрх суурьшин амьдардаг бөгөөд тэдгээрийн нийгмийн асуудалд онцгой анхаарах ёстой. Энэ төрлийн судалгааг хийж байгаа гэдгийг хэлж байсан юм.

     Сэлэнгэ мөрөн Байгаль нуурт цутгадаг нийт урсцын 49,7%-ийг бүрдүүлдэг бөгөөд үүнээс Монголын талын Сэлэнгэ мөрөн 31,06%-г эзэлдэг. Уг усан цахилгаан станц ОХУ-ын хилээс 150 гаруй км, Байгаль нуураас 550 км зайд буюу Сэлэнгэ аймгийн Цагааннуур сумын нутагт Шүрэнгийн голын цутгалаас дээш 5 км улсын хилээс 125 км зайд байрлана.