Монгол туургатны дээл хувцас нь  монголчуудын ёс заншил, цаг агаар, аж ахуй, амьдралын хэв маягтай холбоотойгоор бүрэлдэж, өнөөдрийг хүртэл өвөрмөц донж төрхийг агуулан хөгжин шинэчлэгдсээр байна. Үндэсний хувцасаар дамжуулан залуу хойч үедээ түүх, соёлоо уламжлан үлдээх, дэлхий дахинд Монгол үндэстэн гэдгээ түгээн таниулах зорилгоор  “Дээлтэй Монгол” наадмыг Үндэсний их баяр наадмын үеэр уламжлал болгон зохион байгуулсаар байна.

Тэгвэл Ховд аймгийн баяр наадмын үеэр  Урлаг, соёл, спортын асуудал хариуцсан салбар хорооноос "САЙХАН НААДАМЧИН-2017" уралдааныг "Насанд хүрэгчид", "Хүүхэд" гэсэн 2 ангилалаар зохион байгуулж, Монгол үндэсний хувцсаараа гоёсон наадамчдыг шалгаруулан, аймгийн Засаг даргын Өргөмжлөл, Энгэрийн тууз, мөнгөн шагналаар  шагнаж урамшууллаа. "Насанд хүрэгчид"-ийн ангиалалд Манхан сумын Зэрэг гол багийн малчин, Монгол Улсын гавьяат малчин Х.Эрдэнэ, Н.Наранцэцэг нар "Хүүхэд"-ийн ангилалд Жаргалант сумын харьяат Г.Энхзул, Г.Энхэнэрэл нар шалгарлаа.