Архангай аймгийн Номын сан 120,0 мянга гаруй номтой. Бусад аймгуудтай харьцуулахад номын фонд харьцангуй өндөртэйд тооцогддог. Гэсэн ч сүүлийн жилүүдэд номын фонд багасах төлөвтэй болсон байна. Энэ нь хүмүүсийн ном унших хандлага, сонирхож байгаа ном зэрэг нь өөрчлөгдөж байгаагаас, мөн шинээр хэвлэгдсэн номоор фондоо баяжуулах боломж муугаас шалтгаалж байгаа юм байна.
Аймгийн Нийтийн номын сангийн номын фондын баяжилтанд жилд 4 сая төгрөгийг зарцуулахаар төсөвлөдөг. Энэ нь шинээр гарч байгаа номуудыг худалдан авахад хүрэлцдэггүй. Гэвч төсөвтөө тааруулан үр ашигтай худалдан авалт хийхэд анхаарч, уншигчдынхаа сонирхол, хэрэгцээнд нийцүүлэн, уншууртай,танин мэдэхүй, шинжлэх ухааны чиглэлийн номуудыг худалдан авч, номын фондоо баяжуулж байгаа аж.