2012 оноос Монгол Улсын Засгийн газраас “Усны аюулгүй байдлын төлөвлөгөөг хэрэгжүүлж” эхэлсэн бөгөөд 2014 оноос 21 аймагт хэрэгжүүлсэн байна. Харин өнгөрөгч 2016 онд хэрэгжилтийн үйл явцыг үнэлэхэд 10 аймагт усны аюулгүй байдлын төлөвлөгөөг эрчимжүүлэх шаардлагатай гэж үнэлэгдсэн байгаа юм. Энэ аймгуудын дунд Архангай аймаг орсон бөгөөд усны аюулгүй байдлын үндэсний зөвлөх, мэргэжилтнүүд дээрх аймгуудад зөвлөн туслах үйлчилгээ үзүүлэх шаардлагатай болжээ.

Үүний дагуу Эрүүл мэндийн яамны “Усны аюулгүй байдлын төлөвлөгөө“-ний үндэсний зөвлөх С.Бурмаа манай аймагт ажиллаж, аймгийн Засаг дарга Ц.Мөнхнасан болон Засаг даргын орлогч Б.Болормаатай уулзаж “Усны аюулгүй байдлын төлөвлөгөө“-ний талаарх мэдээллийг өгч, цаашид төлөвлөгөөгөө боловсруулан аймгийн Иргэдийн төлөөлөгчдийн хурлаараа батлуулж, бодлогын хэмжээнд авч явах шаардлага байгаа талаар зөвлөлөө.

Эрүүл мэндийн яамны “Усны аюулгүй байдлын төлөвлөгөө“-ний үндэсний зөвлөх С.Бурмаа Архангай аймагт өчигдөр ажиллаж, ус сувгийн “Ундарга” ТӨХК-тай хамтран ундны усны эрсдэлийн үнэлгээг гаргасан байна. 
Энэ үнэлгээгээр ундны усны эх үүсвэрийн хамгаалалтын хязгаарыг хуулийн дагуу хийгээгүй, энгийн хамгаалалтыг сайжруулж, камержуулалтыг сайжруулах, ундны усны болон цахилгааны нөөцгүй, цэвэр усны шугам сүлжээг сайжруулах, ялангуяа орон сууцуудын хоорондох босоо, хэвтээ шугамыг шат дараатай шинэчлэх, цэвэр усны 2-р өргөх станци эрүүл ахуйн аюулгүй байдал ноцтой хэмжээнд байгаа, усны машинуудын насжилт урт, парк шинэчлэлт хийх, цэвэр усны алдагдал 40 хүртэл хувьтай гэх мэтчилэн ундны усны аюулгүй байдлыг хангаагүй эрсдэлүүд байгааг гаргажээ. Мөн цаашид аймагтаа бодлогын хэмжээнд өрхийн ундны усны зөөх болон хадгалах савыг өөрчилж стандартын савтай болгох хэрэгцээ байна гэдгийг С.Бурмаа хэлж байв.