Эрүүл мэндийн даатгалын сангаас 20 бүлгийн 817 нэр төрлийн эмийг хөнгөлөлттэй олгодог байна. Эдгээр эмийг өрхийн болон сумын эмч, нарийн мэргэжлийн зарим эмчийн бичгээр 40-80 хувийн хөнгөлөлтөөр авах боломжтой аж.

Аймгийн хэмжээнд хөнгөлөлттэй эмээр үйлчилдэг нийт 22 эмийн сан байдаг. Эрдэнэбулган суманд Хаш, Мөнгөт-Оюу, Эм импекс, Сүмбэр эмийн сан хөнгөлөлттэй эмээр үйлчилдэг ажээ. 2017 онд хөнгөлөлттэй олгодог эмийн төсөвт аймгийн хэмжээнд 450 сая төгрөг батлагдсан байна. Энэ мөнгийг жилийн 12 сард хуваан дээрх 22 эмийн санд хуваарилдаг аж.

Хөнгөлөлттэй олгодог 817 нэр төрлийн эмнүүд дээр нэмж элэгний С вирусийн эсрэг таван нэр төрлийн эмийг хайрцаг тутамд нь 210 мянган төгрөгийг хөнгөлдөг болжээ. Хөнгөлөлттэй эмийг авч хэрэглэх иргэд заавал эмчийн бичигтэй, эрүүл мэндийн даатгалын дэвтэртэйгээ очиж үйлчлүүлэх юм байна.