Аймгийн ЗДТГ, Биеийн тамир, спортын газраас Монголын тамирчдын өдөр, Олон улсын олимпийн өдрийг тохиолдуулан төв нутгийн спортын зүтгэлтнүүд, тамирчдад хүндэтгэл үзүүллээ. Тус арга хэмжээнд аймгийн Засаг даргын орлогч Ч.Сарангэрэл, БТСГазрын даргын үүргийг түр орлон гүйцэтгэгч Д.Алтанхуяг болон спортыг дэмжигч байгууллагуудын удирдлагууд, тамирчдын төлөөлөл оролцсон юм. 2019 он гарсаар Төв аймгийн тамирчид улс, олон улс тив дэлхийн тэмцээн, уралдаанаас 260 гаруй медаль хүртсэн амжилтаар энэ жилийн Монгол тамирчдын өдөр, Олон улсын олимпийн өдрийг тэмдэглэн өнгөрүүлж байгаа юм. Мөн манай аймгийн хувьд одоогийн байдлаар олон улсын чанартай хоёр тэмцээн, улсын аварга шалгаруулах нэг удаагийн тэмцээнийг зохион байгуулсан бол цаашид олон улсын байт харвааны тэмцээн болон кроссын тэмцээнүүдийг зохион байгуулахаар төлөвлөн ажиллаж байна.
