Аймгийн удирдлагууд аймгийн Мал эмнэлгийн газрын үйл ажиллагаатай танилцлаа. Мал эмнэлгийн шинэ барилга нь 2021 онд ашиглалтад орж эрүүл мэндийн үзлэг, тандалт шинжилгээ, халдваргүйтгэл, дархлаажуулалт, шилжилт хөдлөгөөний хяналтыг хийж, Ийлдэс судлал, нян судлал, ариун цэвэр магадлан шинжилгээ, шимэгч судлалын лабораторууд тогтмол үйл ажиллагаа явуулж байгаа талаар Мал эмнэлгийн газрын дарга А.Саруулжаргал танилцууллаа. Аймгийн удирдлагуудын зүгээс аймаг болон сумын мал эмнэлгийн тасаг нь малчдад мэдээ мэдээлэл заавар зөвлөмжийг тогтмол өгч ажиллахыг хүсч ИТХ-ын дарга Б.Батжаргалын зүгээс дараах зүйлс дээр анхаарч ажиллахыг зөвлөлөө.
- Мал эрүүл байх нь хамгаас чухал бөгөөд малаас гарч байгаа түүхий эд хэрэглэгчийн гарт очихоос өмнө заавал лабораторийн шинжилгээ хийгдэж хүргэгддэг байх, үүнд хяналтыг сайжруулах нь чухал,
- Мал нядалгааны газрыг аймагт төдийгүй сумдад бий болгох ингэснээр малын хулгайн гаралт буурах, эрүүл аюулгүй мах бэлтгэх боломж бүрдэх тул анхаарч ажиллах шаардлагатай.
Мөн сумдын Мал эмнэлгийн тасаг хариуцсан мэргэжилтнүүд албан өрөөндөө гарал үүслийн бичгийг баталгаажуулаад суух биш малчдад хүрч үйлчилгээ үзүүлж ажиллах. Цаашид хувийн мал эмнэлгүүдтэй хамтран ажиллах, эм тариаг жоргүйгээр олгохгүй байх малын эмчийн жороор олгох хаврын 13 ажил, намрын 8 ажлыг өрнүүлэх мөн мал угаалгын ванныг 1 удаа хэрэглээд орхих биш эзэнжүүлж, бүртгэлжүүлэх нь зүйтэй гэлээ.
