Монгол Улсын Үндсэн хууль батлагдсаны 30 жилийн ойд зориулан Улсын Их Хурлаас жил бүр уламжлал болгон зохион байгуулдаг Шатар сонирхогчдын улсын аварга шалгаруулах тэмцээний шувтаргын тоглолт өнөөдөр /2021.01.08/ Төрийн ордонд эхэллээ.
Энэ удаагийн тэмцээн сум, дүүргийн хэмжээнд “анхан шат”, аймаг, нийслэлийн хэмжээнд “хагас шигшээ”, улсын хэмжээнд “шигшээ” гэсэн гурван үе шаттай явагдаж байна.
Энэ жилийн анхан шатны тэмцээнд 331 сум, нийслэлийн 9 дүүрэгт 5272 шатарчин оролцож, оролцогчдын тоо өнгөрсөн жилийнхээс 8 хувь өссөн байна.
Харин хагас шигшээ тэмцээн 21 аймаг, нийслэлд болж, 645 шатарчин оролцсон байна.
Нийт давхардсан тоогоор улсын хэмжээнд 6037 шатар сонирхогч оролцсон бөгөөд шувтаргын шигшээ тэмцээнд эрэгтэй 80, эмэгтэй 32 шатарчин шалгараад байна.
Шатар сонирхогчдын Улсын аварга шалгаруулах тэмцээний шигшээ тоглолтод Ховд аймгаас эрэгтэй төрөлд К.Өлзийсайхан, эмэгтэй төрөлд Д.Цэрэнлхам нар оролцож байна.
