Өнөөдөр /2022.02.17/ Чингэлтэй дүүргийн Иргэдийн Төлөөлөгчдийн Хурлын дарга Б.Мөнхбат, дүүргийн Засаг дарга Н.Батсүмбэрэл, Иргэдийн Төлөөлөгчдийн Хурлын даргын зөвлөх, Төлөөлөгч Т.Идэрцагаан нар “Чингэлтэй дүүргийн Жижиг дунд үйлдвэрийг дэмжих төв”-ийн үйл ажиллагаатай танилцан жижиг, дунд үйлдвэрлэл эрхлэгчдийн санал, хүсэлтийг хүлээн авч, цаашид дэмжин ажиллахаа илэрхийллээ.

      “Чингэлтэй дүүргийн Жижиг дунд үйлдвэрлэлийг дэмжих Бизнес инкубатор төв” нь 2011 оны 12 сарын 14-ний өдөр Чингэлтэй дүүргийн Иргэдийн Төлөөлөгчдийн Хурлын Тэргүүлэгчдийн 94 дүгээр тоот тогтоолоор байгуулагдаж, 2021 оны 10 дугаар сарын 01-ний өдөр Чингэлтэй дүүргийн Иргэдийн Төлөөлөгчдийн Хурлын Тэргүүлэгчдийн 46 дугаар тогтоолоор “Чингэлтэй дүүргийн Жижиг дунд үйлдвэрийг дэмжих төв” болон үйл ажиллагаагаа өргөжүүлэн ажиллаж байна.

         Өнөөдрийн байдлаар тус төв нийт 9 чиглэлээр /сүлжмэл, модон эдлэл, оёдол, арьсан эдлэл, гутал, эсгий эдлэл, төмөр хийц, бэлэг дурсгал, бусад/ үйл ажиллагаа явуулдаг 805 бичил, жижиг, дунд үйлдвэрлэл, 2400 иргэний ажлын байранд дэмжлэг үзүүлж, түрээсийн хөнгөлөлттэй ажлын байранд 19 үйлдвэрлэл эрхлэгч, зөөврийн ажлын байраар 123 үйлдвэрлэл эрхлэгчдийг дэмжин үйлдвэрлэлийн зориулалттай 2 салбар байртайгаар үйл ажиллагаагаа явуулж байна.

ХУРЛЫН АЖЛЫН АЛБА