Орхон аймгийн газар зохион байгуулалтын ерөнхий төлөвлөгөөг аймгийн ИТХ-ын хуралдаанаар баталлаа. Уг төлөвлөгөө 2022-2037 онд хэрэгжих бөгөөд бүх төрлийн нөөцөд тулгуурлан үйлдвэрлэл, аж ахуйн салбаруудыг оновчтой байршуулах, төрөлжүүлэх, тэдгээрийн харилцан хамаарал, нутагшил, суурьшлыг оновчтой төлөвлөх суурь баримт бичиг юм.
Ерөнхий төлөвлөгөөнд туссан бүсчлэлийн дагуу байгаль экологид хор хохирол багатай, нийгэм эдийн засгийн хувьд үр дүнтэй байхаар хэсэгчилсэн төлөвлөлтийг хийх юм. Өмнөх ерөнхий төлөвлөлтөд туссан суурьшлын бүсийг бүрэн барилгажуулсан бөгөөд 2022-2037 оны хүртэлх ерөнхий төлөвлөгөөнд 1000 орчим га газраар суурьшлын бүсийг нэмэгдүүлэх, 1100 орчим га газрыг ойжуулах, 32 га газарт хөв цөөрөм хамгаалах зорилгоор хамгаалалтын зурвас байгуулах зэрэг багтжээ.