Ховд аймаг дахь Магадлан итгэмжлэгдсэн Хөгжил Политехник коллежийн түүхт 80 жилийн ой энэ онд тохиож байна.

Тэртээх 1944 онд мал эмнэлгийн сургууль нэртэйгээр анх байгуулагдаж малын эмч, зоотехникч, агротехникч мэргэжлээр мэргэжилтэн бэлдэж эхэлсний 80 жилийн түүхэн ойгоо эдгээр өдрүүдэд тэмдэглэн өнгөрүүлж байна.

Өнөөдөр (2024.09.04) тус сургуулийн түүхт 80 жилийн ойн баярын нээлтийн арга хэмжээ боллоо.

Түүхэн ойн нээлтэд аймгийн ИТХ-ын дарга Г.Пүрэвганди оролцож, мэндчилгээ дэвшүүлж, үг хэллээ. Мөн Ховд аймгийн Хөгжил Политехник коллежийн захирал Д.Баярмаа болон тус сургуультай ажил амьдралын холбоотой үе үеийн удирдлагууд, төгсөгчид, эрдэмтэн багш нар, одоо ажиллаж байгаа болон суралцаж байгаа багш, сурагчид оролцлоо.

Хөгжил Политехник коллеж нь өнөөдрийн байдлаар техникийн болон мэргэжлийн боловсрол олгохоор нийт 33 мэргэжлээр 1300 гаруй оюутан суралцагч, 130 гаруй багш ажилчидтайгаар сургалтын үйл ажиллагаагаа явуулж байна.

Сүүлийн 6 жилийн хугацаанд сургалт үйл ажиллагаагаараа улсдаа тэргүүлэн дэлхийн ур чадварын мэргэжлийн тэмцээнд багш, суралцагчид амжилттай оролцсоор ирсэн.

Мөн шинэ хичээлийн байртай болж, орчин үеийн шаардлагад нийцсэн тоног төхөөрөмжөөр дотоод нөөцөө өргөжүүлж, оюутан суралцагчдын сурч боловсрох, практик дадлага хийх таатай орчныг бүрдүүлж чаджээ.