Сэлэнгэ аймгийн Жавхлант сумын иргэн Намхайн Михлайн газар тариалангийн салбарт 50 гаруй жил үр бүтээлтэй ажилласан хөдөлмөр зүтгэлийг нь үнэлэн Монгол Улсын Ерөнхийлөгчийн 2025 оны 02 дугаар сарын 24-ний өдрийн 26 дугаар Зарлигаар “Алтан гадас” одонгоор шагнасныг аймгийн иргэдийн Төлөөлөгчдийн Хурлын дарга Г.Бат-Орхон өнөөдөр /2025-03-06/ гардуулан өглөө.
Н.Михлай нь 1975 оноос одоог хүртэл газар тариалангийн салбарт халуунд халшралгүй, хүйтэнд зутралгүй залуу идэр наснаасаа өнөөдрийг хүртэл 50 гаруй жил тасралтгүй ажиллаж, хүн амыг гурил тэжээлээр хангах нөр их үйлсэд хүчин зүтгэжээ.
Н.Михлай нас сүүдэр хэдий 70 гарсан ч сүүлийн 10 гаруй жил М.Цанлиг захиралтай “Тариатын буудай” ХХК-д Трактор-комбайнчаар ажиллан, улс орныхоо үр тариа, хүнсний бүтээгдэхүүний үйлдвэрлэлийг нэмэгдүүлэхийн төлөө өөрийн хүч чадал, хөдөлмөр зүтгэлээ дайчлан ажиллахын зэрэгцээ газар тариалангийн салбарт залуу боловсон хүчнийг бэлтгэн дадлагажуулсаар ирсэн байна.
