Увс аймгийн гэмт хэргээс урьдчилан сэргийлэх салбар зөвлөлийн дэргэд 2019 оны 3-р сард Хүрээлэн байгаа орчны эсрэг гэмт хэргээс урьдчилан сэргийлэх дэд зөвлөл байгуулагдсан. Энэхүү зөвлөлөөс иргэдэд хүрээлэн байгаа орчны гэмт хэрэг, зөрчлөөс урьдчилан сэргийлэх ажлыг зохицуулах аймгийн ИТХ-ын нарийн бичгийн даргаар ахлуулсан цагдаа, прокурор, МХГ, БОАЖГ зэрэг хүрээлэн байгаа орчны гэмт хэрэгтэй тэмцэх үүрэг чиглэл бүхий байгууллагуудаас бүрдсэн шуурхай баг гарсан.

Энэхүү багийн үйл ажиллагааг Дэлхийн байгаль хамгаалах сангийн Монгол дахь хөтөлбөрийн газраас дэмжиж МХГ-ын нэг өрөөг бүрэн тохижуулж, 30 сая төгрөгийн майхан, зөөврийн компьютер, принтер, дэлгэц, зургийн аппарат, дрон, дуран, аяны хөнжил гудас, GPS, гэх мэтчилэн 19 нэр төрлийн тоног төхөөрөмжийг гардуулан өглөө. Мөн хууль хэрэгжүүлэх байгууллагыг дэмжихээс гадна хил хамгаалах байгууллагад мотоцикл, дуран, GPS гэх мэтийн тоног төхөөрөмжийг гардууллаа. Дэлхийн байгаль хамгаалах сангийн Монгол дахь хөтөлбөрийн газар нь 2018 оноос эхлээд “Ирвэстэй нутгийн ирээдүй” төслийг Увс, Говь-Алтай, Баян-Өлгий аймгийн ирвэс бүхий зургаан нутгийг хамруулан хэрэгжүүлж эхэлсэн.